28 მაისს ინფორმაციის თავისუფლების განვითარების ინსტიტუტმა ხაშურის მე-8 საჯარო სკოლის მოსწავლეებს უმასპინძლა. ორგანიზაციის დირექტორმა, გიორგი კლდიაშვილმა მოსწავლეებს ლექცია ჩაუტარა სტალინიზმის შესახებ.

შეხვედრის ფარგლებში მომხსენებელი შეეხო 1937-38 წლების რეპრესიების თემას და ისაუბრა ორგანიზაციის გამოცდილებაზე ამ პერიოდის შესწავლის კუთხით. საქართველოში 1937-1938 წლებში სტალინის და პოლიტბიუროს წევრთა უშუალო ხელმოწერით 3615 ადამიანი იქნა რეპრესირებული. მოსკოვიდან თბილისში იგზავნებოდა რეპრესირებულთა სახელები, გვარები და სასჯელის ზომა. საქართველოზე ასეთი 12 სია არსებობს, რომელიც სხვადასხვა დროს იქნა გამოგზავნილი.

მოსწავლეები გაეცნენ რეპრესიების მსხვერპლთა სურათებსა და გასამართლების ოქმებს. ასევე, საუბარი შეეხო რეპრესირებულთა სამარხების თემას. ჯერჯერობით, მსხვერპლთა სამარხები საქართველოში აღმოჩენილი არ არის. გიორგი კლდიაშვილმა დამსწრეებს გაუზიარა IDFI-ს პოლონელი პარტნიორების გამოცდილება და დასძინა, რომ უახლოეს მომავალში საქართველოში იგეგმება რეპრესირებულთა სამარხების ძიება პოლონელი პარტნიორების დახმარებით.

გარდა 1937-38 წლების რეპრესიებისა, შეხვედრაზე ისაუბრეს 1924 წლის აგვისტოს აჯანყებაში მონაწილეების ბედზე. მოსაწავლეებმა განსაკუთრებული ინტერესი გამოხატეს რეპრესირებულთა ბაზაში მოძიებული წარმოშობით ხაშურის რაიონიდან მყოფი ადამიანების მიმართ. მათ გადაეცათ ამ პირთა სიები. მოსწავლეებმა აღნიშნეს, რომ დაწვრილებით ინფორმაციას მოიძიებენ ამ ადამიანებზე და გამოთქვეს ორგანიზაციასთან თანამშრომლობის და არქივში მუშაობის სურვილი.

IDFI მიესალმება მოსაწავლეთა დაინტერესებას ამ საკითხით.