ORT-ს პროგრამების რეტრანსლატორის - შპს „რ.ბ.ჯ.“-ს სანქცირების საკითხის განხილვა მარეგულირებელში 19 ნოემბერს უნდა დასრულდეს.

2 ნოემბერს ა(ა)იპ „ინფორმაციის თავისუფლების განვითარების ინსტიტუტმა“ (IDFI) განცხადებით მიმართა საქართველოს კომუნიკაციების ეროვნულ კომისიას და მოითხოვა შპს „რ.ბ.ჯ.“-ს სანქცირება, „მაუწყებლობის შესახებ“ საქართველოს კანონის და მარეგულირებელი კომისიის გადაწყვეტილებების მოთხოვნათა დარღვევის გამო.

შპს „რ.ბ.ჯ.“-ს მიერ ხორციელდება რუსეთის ფედერაციის საზოგადოებრივი სახელმწიფო ტელევიზიის - ORT-ს პირველი არხის პროგრამების თარგმნა და გავრცელება ღია საეთერო ციფრული ქსელით.

აღნიშნული მაუწყებლის პროგრამები, ციფრული საეთერო მაუწყებლობის ქსელით, რამდენიმე საათით, 2015 წლის ივლისში გავრცელდა, თუმცა, კომისიის ჩარევის შედეგად, მაუწყებლობა შეწყდა. მიუხედავად ამისა, რამდენიმე თვის შემდეგ, ნოემბრის დასაწყისში მაუწყებლობა განახლდა. 

კანონის და ავტორიზაციის პირობების დარღვევის გამო, 2015 წლის ივლისში კომისიამ მაუწყებელს სანქციის სახით გაფრთხილება მისცა. აღნიშული კომპანიის სანქცირების საკითხის განხილვისას, მიმდინარე წლის 12 ნოემბერს, საქართველოს კომუნიკაციების ეროვნულმა კომისიამ, შპს „რბჯ“-ს გარკვეული ინფორმაციის წარმოდგენა მოსთხოვა. საბოლოო გადაწყვეტილებას მარეგულირებელი 19 ნოემბერს მიიღებს.