საქართველოს მთავრობამ 2014 წლის 7 თებერვალს საქართველოს ეკონომიკისა და მდგრადი განვითარების სამინისტროს მიერ წარდგენილი ციფრულ სატელევიზიო მაუწყებლობაზე გადასვლის სამოქმედო გეგმა და რეკომენდაციები დაამტკიცა. ციფრულ მაუწყებლობაზე გადასვლის საბოლოო სტრატეგიის შემუშავებამდე პროცესში ჩართულმა მხარეებმა 14 თვიანი სამუშაო პერიოდი განვლეს. არასამთავრობო სექტორის წარმომადგენლების აქტიურობამ, კერძოდ IDFI-ის და მისი პარტნიორი ორგანიზაციის GARB-ის ერთობლივი მუშაობის შედეგად, საქართველოს ეკონომიკისა და მდგრადი განვითარების სამინისტრომ მთლიანად შეცვალა 2013 წლის მარტში წარმოდგენილი სტრატეგია. აქტიურად გაგრძელდა კონსულტაციები, დაინტერესებული მხარეების ჩართულობით და მნიშვნელოვანი ცვლილებების შედეგად, 7 თებერვალს თვისობრივად ახალი სტრატეგია იქნა წარდგენილი, რომელიც მთავრობამ დამტკიცა.

საქართველოს ციფრულ საეთერო პლატფორმაზე გადასვლა, სხვადასხვა სუბიექტური და ობიექტური ფაქტორების გამო, მაქსიმალურად მცირე დროში უნდა განხორციელდეს. სწორედ დროის სიმცირე არის ამ პროცესის უმთავრესი გამოწვევა. ახალ სამაუწყებლო პლატფორმაზე გადასვლის გრაფიკი, რომელიც დამტკიცდა საქართველოს მთავრობის მიერ, საქართველოს ეკონომიკისა და მდგრადი განვითარების სამინისტროს წარდგინებით, მოითხოვდა ზუსტ შესრულებას და მაქსიმალურად გაწერილი დროის შუალედის დაცვას. მიმდინარე პროცესში ჩართულია საქართველოს ეკონომიკისა და მდგრადი განვითარების სამინისტრო, სსიპ „ციფრული მაუწყებლობის სააგენტო", შპს „ტელერადიო ცენტრი“, საქართველოს კომუნიკაციების ეროვნული კომისია.

/public/upload/IDFI/DSO.edited.pdf