„ინფორმაციის თავისუფლების განვითარების ინსტიტუტმა“(IDFI) ელექტრონული მმართველობისა და ინფორმაციის გამჭვირვალობის თემაზე დისკუსია გაიმართა.
შეხვედრა ჩატარდა რობერტ ბოშის ფონდის, გერმანიის საგარეო პოლიტიკის საზოგადოებისა და კარლ-ფრიდრიხ გოერდელერის ეფექტური მმართველობის კოლეჯის ერთობლივი პროექტის ფარგლებში.
  აღნიშნული პროექტი მიზნად ისახავს აღმოსავლეთ  პარტნიორობის ქვეყნებიდან და თურქეთიდან ახალგაზრდა ლიდერების კვალიფიკაციის ამაღლებასა და  ახალი პროექტების განხორციელების ხელშეწყობას.
პროექტში მონაწილეობა IDFI-ს სახელით მარიკა კეჭაყმაძემ მიიღო, რომელიც მუშაობს კვლევით პროექტზე ელექტრონული ჩართულობის შესახებ.

ქართველი მონაწილეების ინიციატივით,  შუალედური შეხვედრა 1-4 მარტს საქართველოში ჩატარდა.

2 მარტს ფონდ ღია საზოგადოება საქართველოს ოფისში პროექტის ფარგლებში IDFI-ს ინიციატივით გაიმართა დისკუსია საქართველოში ელ-მმართველობის და ელ-დემოკრატიის განვითარების თემაზე.

შეხვედრაზე საუბარი შეეხო საქართველოში ინფორმაციის გამჭვირვალობის, ელექტრონული მმართველობის განვითარების და ასევე, მონაცემთა დაცვისა და ინფორმაციული უსაფრთხოების საკითხებს.

IDFI-ს დირექტორმა გიორგი კლდიაშვილმა დამსწრე საზოგადოებას გააცნო საქართველოში ინფორმაციის თავისუფლების განვითარების ტენდენციები, ისაუბრა მიმდინარე პროექტებზე, საჯარო დაწესებულებებში საჯარო ინფორმაციის ხელმისწვდომობის და საჯარო დაწესებულებების ოფიციალური ვებ-გვერდების ინფორმაციული გამჭვირვალობის და ელ-მმართველობის მონიტორინგის საკითხებზე, ასევე, ელექტრონული დემოკრატიის დანერგვაზე საქართველოში და იმ პრობლემებზე და სამომავლო პერსპექტივებზე, რომლებიც უკავშირედება აღნიშნულ საკითხებს.
დისკუსიაში IDFI-სთან ერთად მონაწილეობა მიიღეს სსიპ -მონაცემთა გაცვლის სააგენტოს წარმომადგენლებმა. სააგენტოს დირექტორმა ირაკლი გვენეტაძემ და იურიდიული დეპარტამენტის ხელმძღვანელმა  ნატა გოდერძიშვილმა დამსწრე საზოგადოებას წარუდგინეს 2011 წელს მონაცემთა გაცვლის სააგენტოს მიერ დანერგილი ელექტრონული  სერვისები და შემუშვებული კანონ-პროექტები, რომლებიც საქართველოში ელექტრონული მმართველობის და ინფორმაციული უსაფრთხოების თემას ეხება.
წარდგენილი პრეზენტაციების შემდგომ გამომსვლელებმა აუდიტორიის შეკითხვებს უპასუხეს.

შეხვედრას ესწრებოდნენ  ევროკომისიის ყოფილი ვიცე-პრეზიდენტი და გოერდელერის კოლეჯის დირექტორი  გიუნტერ ვერჰოიგენი, გერმანიის საგარეო პოლიტიკის საზოგადოების წარმომადგენელი  და პროექტის ხელმძღვანელი მარი-ლენა მაი და ბოშის ფონდის პროექტების  დირექტორი მარკუს ლუქსი. ასევე მონაწილეები ევროკავშირის აღმოსავლეთ პარტნიორობის ქვეყნებიდან და თურქეთიდან.