აღნიშნული შესაძლებელია საკმაოდ აქტუალური აღმოჩნდეს ჩვენი სახელმწიფოს ინფორმაციის თავისუფლების პრაქტიკისთვისაც, ვინაიდან საქართველოს კანონმდებლობა არ იცნობს საჯარო ინფორმაციის კომისიონერის ინსტიტუტს. არსებითად ომბუდსმენის თვისებების მატარებელი ამ ორგანოს ფუნქციათა  განსაზღვრა, შესაძლებელია პრაქტიკულ მნიშვნელობას ატარებდეს პოტენციურ საკანონმდებლო ცვლილებებზე საუბრისას. საჯარო ინფორმაციის ღიაობის პოლიტიკის გაუმჯობესება, საჯარო დაწესებულებათა კონტროლის გაძლიერება, საჯარო მოსამსახურეთა ცნობიერების ამაღლება, საზოგადოების მეტი დაცულობა - ეს ინფორმაციის თავისუფლებასთან დაკავშირებულ იმ სიკეთეთა არასრული ჩამონათვალია, რომელიც საქართველოში საჯარო ინფორმაციის კომისიონერის აპარატის შემოღებით თუ არა, მსოფლიოს ქვეყნებში არსებულ ამ ორგანოს ფუნქციური ელემენტების გადმოღებით არის მეტ-ნაკლებად მიღწევადი.