4 სექტემბერს გაიმართა მედია კონფერენცია, რომელშიც მონაწილეობდა ინფორმაციის თავისუფლების განვითარების ინსტიტუტის (IDFI) ანალიტიკოსი, ნატა ძველიშვილი. მან გააკეთა მოხსენება ბოლო ერთი წლის მანძილზე, მედიაში განვითარებული მოვლენების შესახებ. აღნიშნულთან დაკავშირებით, ნატა ძველიშვილი მიიწვიეს PALITRA TV-ის გადაცემაში "რეზიუმე", სადაც მან კიდევ ისაუბრა იმ მნიშვნელოვან ფაქტებზე, რაც ბოლო ერთი წლის განმავლობაში ქართულ მედია სივრცეში გამოვლინდა. გაიხსენა მაესტროს შემთხვევა. კერძოდ, ტელეკომპანია მაესტროდან საინფორმაციო გამოშვების წამყვანის, რამდენიმე რეიტინგული წამყვანისა და სხვა ჟურნალისტების წასვლა, დამფუძნებლის განცხადება, რომლის მიხედვითაც მან დატოვა მესაკუთრეთა რიგები. ასევე, ისაუბრა ბოლო დროს იმედის რეორგანიზაციულ ნაბიჯებზე და რამდენიმე პოლიტიკური თოქ-შოუს დახურვის შესახებ, რუსთავი 2-ის ირგვლივ განვითარებულ მოვლენებზე და აღნიშნა, რომ ყველა მათგანი საზოგადოებაში ეჭვსა და კითხვებს ბადებს.

8 სექტემბერს, რუსთავი 2-მა სიუჟეტი მოამზადა, რომელიც საზოგადოებრივი მაუწყებლის დირექტორის, გიორგი ბარათაშვილის დადანაშაულებას ეხებოდა ნეპოტიზმში. ორგანიზაცია მედიატორის მტკიცებით, საზოგადოებრივ მაუწყებელში სხვადასხვა პოზიციაზე გიორგი ბარათაშვილთან დაახლოებული პირები და ნათესავები არიან დასაქმებულები. აღნიშნული ფაქტის შესახებ, კომენტარი ინფორმაციის თავისუფლების განვითარების ინსტიტუტის (IDFI) ანალიტიკოსმა, ნატა ძველიშვილმა გააკეთა და განმარტა, რომ გიორგი ბარათაშვილს მოუწევს საზოგადოება დაარწმუნოს, რომ მისი ახლობლები და ნათესავები მხოლოდ იმიტომ მუშაობენ ამ უწყებაში, რომ ისინი არიან პროფესიონალები და კვალიფიციურები.